رولي باللحم المرحي

السلام عليكم و رحمة الله تعالى و بركاته

اليوم سأقدم وصفة من ابتكاري ..بسيطة و سهلة و ان شاء الله تجربوها و تنجحوا

نبداو اولا بمقادير العجينة:

-كوب حليب دافئ

-فنجان زيت

-قرصة ملح

-ملعقة خميرة الكسرة

-ملعقة خميرة كيميائية

-فرينة

مقادير الحشو:

-20 حبة زيتون اسود مقطع

-حبة فلفل اخضر كبيرة

-300 غ لحم مرحي

-بصلة مبشورة

-2 سنينات ثوم

-5 ملاعق كبار زيت

-ملعقة معجون طماطم

-ملح.فلفل اكحل.توابل مخلطة

-بيضتين مسلوقتين

-جبن

طريقة التحضير :

-في اناء تخلطي الحليب و الزيت و قرصة الملح و نوعي الخميرة و مبعد تبداي تزيدي في الفرينة حتى تتحصلي على عجينة متماسكة

-تخليها ترتاح مدة 15 دقيقة و تعاودي تعجنيها و تخليها ترتاح مرة اخرى في مكان دافئ

-في هذاك الوقت حطي المقلاة على نار متوسطة سخني الزيت و البصلة و الثوم و اللحم و ديري الملح و الفلفل الاكحل و التوابل و ملعقة الطماطم و حركي مليح

-كي يبدا اللحم يتلون زيدي الفلفل و الزيتون و ما تخليش الفلفل يذبال تماما

-في وعاء اخر حطي 3 ملاعق كبار معجون طماطم (و لي تحب تزيد معاهم ملعقة هريسة) و ملعقة زيت ..و سخنيهم فوق النار شوي حوالي 2 دقائق مع التحريك

-في الوقت هذا شعلي الفرن على درجة 180

-جيبي العجينة (راح تلقيها زادت في الحجم) ..افرشي طاولة العمل بالفرينة و حلي العجينة بسمك 2 ملم و اقسميها على 2 من الوسط

-ادهني العجينة بخليط الطماطم و الهريسة

-حطي الحشوة تاعك على العجينة (طبعا تكوني قسمتي الحشوة على 2 ) و خلي مسافة باه كي ترولي العجينة في الاخير تتغلق ليك

-ديري البيض المسلوق المبشور على كلا العجينتين

-و ديري الفرماج العادي (طبعا مقسوم لقطع)

-مبعد رولي العجينة تاعك بالشوي حتى للاخر و اضغطي على الحواشي مليح باه ما يخرجش الحشو

-ادهني الصينية تاعك بالزيت مليح

-حطي الرولي تاعك (طبعا راح يكونو 2) في الصينية و بعديهم على بعضاهم

-اخفقي بيضة و ادهني بيها من فوق الرولي

-زيدي حطي الجلجلانية من فوق (السمسم)

-و دخليهم للفرنعلى درجة 200 مدة 20 دقيقة (على حساب الفرن ممكن 17د و ممكن 25) المهم عسيها حتى تشوفيها طابت من تحت

-مبعد كي طيب من تحت حلي عليها الفرن من فوق باه تحمار و عسيها باه ما تتحرقش

-كي تخريها خليها تبرد شوي حوالي 3 دقايق و قطعيها بالسكين اما مقروضات او دوائر و قدميها في صحن مع المايونيز

-راح تكون مقبلة مليحة و الا طبق رئيسي مع السلطة في العشاء و ممكن تكون كبديل للبيتزا ههه

هاذي صورتها ان شاء الله تبان ..

روعه موضوع رائع ومميز
عاشت الايادي دوم التالق
تحياتي